1. มหาจุนฺทตฺเถรคาถา
[141]
‘‘สุสฺสูสา สุตวทฺธนี, สุตํ ปญฺญาย วทฺธนํ;
ปญฺญาย อตฺถํ ชานาติ, ญาโต อตฺโถ สุขาวโหฯ
[142]
‘‘เสเวถ ปนฺตานิ เสนาสนานิ, จเรยฺย สํโยชนวิปฺปโมกฺขํ;
สเจ รติํ นาธิคจฺเฉยฺย ตตฺถ, สงฺเฆ วเส รกฺขิตตฺโต สติมา’’ติฯ
… มหาจุนฺโท เถโร…ฯ
2. โชติทาสตฺเถรคาถา
[143]
‘‘เย โข เต เวฐมิสฺเสน [เวฆมิสฺเสน (สี. สฺยา.), เว คมิสฺเสน, เวขมิสฺเสน (ก.)], นานตฺเตน จ กมฺมุนา;
มนุสฺเส อุปรุนฺธนฺติ, ผรุสูปกฺกมา ชนา;
เตปิ ตตฺเถว กีรนฺติ, น หิ กมฺมํ ปนสฺสติฯ
[144]
‘‘ยํ กโรติ นโร กมฺมํ, กลฺยาณํ ยทิ ปาปกํ;
ตสฺส ตสฺเสว ทายาโท, ยํ ยํ กมฺมํ ปกุพฺพตี’’ติฯ
… โชติทาโส เถโร…ฯ
3. เหรญฺญกานิตฺเถรคาถา
[145]
‘‘อจฺจยนฺติ อโหรตฺตา, ชีวิตํ อุปรุชฺฌติ;
อายุ ขียติ มจฺจานํ, กุนฺนทีนํว โอทกํฯ
[146]
‘‘อถ ปาปานิ กมฺมานิ, กรํ พาโล น พุชฺฌติ;
ปจฺฉาสฺส กฏุกํ โหติ, วิปาโก หิสฺส ปาปโก’’ติฯ
… เหรญฺญกานิตฺเถโร…ฯ
4. โสมมิตฺตตฺเถรคาถา
[147]
‘‘ปริตฺตํ ทารุมารุยฺห, ยถา สีเท มหณฺณเว;
เอวํ กุสีตมาคมฺม, สาธุชีวีปิ สีทติ;
ตสฺมา ตํ ปริวชฺเชยฺย, กุสีตํ หีนวีริยํฯ
[148]
‘‘ปวิวิตฺเตหิ อริเยหิ, ปหิตตฺเตหิ ฌายิภิ;
นิจฺจํ อารทฺธวีริเยหิ, ปณฺฑิเตหิ สหาวเส’’ติฯ
… โสมมิตฺโต เถโร…ฯ
5. สพฺพมิตฺตตฺเถรคาถา
[149]
‘‘ชโน ชนมฺหิ สมฺพทฺโธ [สมฺพทฺโธ (สฺยา. ก.)], ชนเมวสฺสิโต ชโน;
ชโน ชเนน เหฐียติ, เหเฐติ จ [โพธิยติ, พาเธติ จ (ก.)] ชโน ชนํฯ
[150]
‘‘โก หิ ตสฺส ชเนนตฺโถ, ชเนน ชนิเตน วา;
ชนํ โอหาย คจฺฉํ ตํ, เหฐยิตฺวา [พาธยิตฺวา (ก.)] พหุํ ชน’’นฺติฯ
… สพฺพมิตฺโต เถโร…ฯ
6. มหากาฬตฺเถรคาถา
[151]
‘‘กาฬี อิตฺถี พฺรหตี ธงฺกรูปา, สตฺถิญฺจ เภตฺวา อปรญฺจ สตฺถิํ;
พาหญฺจ เภตฺวา อปรญฺจ พาหํ, สีสญฺจ เภตฺวา ทธิถาลกํว;
เอสา นิสินฺนา อภิสนฺทหิตฺวาฯ
[152]
‘‘โย เว อวิทฺวา อุปธิํ กโรติ, ปุนปฺปุนํ ทุกฺขมุเปติ มนฺโท;
ตสฺมา ปชานํ อุปธิํ น กยิรา, มาหํ ปุน ภินฺนสิโร สยิสฺส’’นฺติ [ปสฺสิสฺสนฺติ (ก.)]ฯ
… มหากาโฬ เถโร…ฯ
7. ติสฺสตฺเถรคาถา
[153]
‘‘พหู สปตฺเต ลภติ, มุณฺโฑ สงฺฆาฏิปารุโต;
ลาภี อนฺนสฺส ปานสฺส, วตฺถสฺส สยนสฺส จฯ
[154]
‘‘เอตมาทีนวํ ญตฺวา, สกฺกาเรสุ มหพฺภยํ;
อปฺปลาโภ อนวสฺสุโต, สโต ภิกฺขุ ปริพฺพเช’’ติฯ
… ติสฺโส เถโร…ฯ